မြန်မာသုတေသီများအတွက် အိန္ဒိယနိုင်ငံက နှစ်စဉ်ပညာသင်ဆု ၁၀ ဆုပေးမည်
မြန်မာနိုင်ငံရှိ သုတေသီများအတွက် အိန္ဒိယနိုင်ငံက နှစ်စဉ်ပညာသင်ဆု ၁၀ ဆုပေးသွားမည်ဖြစ်ကြောင်း မြန်မာ-အိန္ဒိယ နှစ်နိုင်ငံပူးတွဲကြေညာချက်အရ သိရသည်။ မြန်မာသုတေသီများအနေဖြင့် အိန္ဒိယတက္ကသိုလ်များနှင့် သုတေသနအဖွဲ့အစည်းများ၌ သုတေသနလုပ်ငန်းများ ဆောင်ရွက်နိုင်စေရန်နှစ်စဉ်ပညာသင်ဆု ၁၀ ဆုပေးအပ်သွားမည်ဟု အိန္ဒိယ၀န်ကြီးချုပ်မှကြေညာခဲ့ကြောင်း၊ အဆိုပါပူးတွဲ ကြေညာချက်တွင် ဖော်ပြထားသည်။ အိန္ဒိယသမ္မတနိုင်ငံဝန်ကြီးချုပ် ဒေါက်တာမန်မိုဟန်ဆင်၏ ပြည်ထောင်စုသမ္မတနိုင်ငံတော်ခရီးစဉ်အတွင်းထုတ်ပြန်သည့် မြန်မာ-အိန္ဒိယနှစ်နိုင်ငံ ပူးတွဲကြေညာချက်များတွင် အဆိုပါအချက်ကို ထည့်သွင်းဖော်ပြထားခြင်းဖြစ်သည်။ ၎င်းအပြင် မြန်မာနိုင်ငံ၏ လူ့စွမ်းအားအရင်းအမြစ် ဖွံ့ဖြိုးတိုးတက်စေရေးအတွက် အိန္ဒိယမှကူညီပေးလိုသည့် ဆန္ဒနှင့်အညီ အိန္ဒိယစီးပွားရေးနှင့် နည်းပညာပူးပေါင်း ဆောင်ရွက်ရေးအပါအ၀င် မြန်မာနိုင်ငံသို့ လက်ရှိသင်တန်းသားဦးရေ ၂၅၀ ဦးခွဲဝေပေးအပ်နေခြင်းအား နှစ်ဆတိုး၍ သင်တန်းသားဦးရေ ၅၀၀ ဦးသို့ တိုးမြှင့်ပေးအပ်သွားမည်ဖြစ်ကြောင်းလည်း သိရသည်။ အိန္ဒိယ၀န်ကြီးချုပ်မှ ရန်ကုန်မြို့ရှိ သတင်းအချက်အလက်နှင့် နည်းပညာမြင့်မားရေးဆိုင်ရာ မြန်မာ-အိန္ဒိယစင်တာအား လာမည့်ငါးနှစ်တာကာလအတွက် နည်းပညာနှင့် ငွေကြေးအထောက်အပံ့များ ဆက်လက်ပေးအပ်သွားမည့်အပြင် နည်းပညာဆိုင်ရာ အဆင့်မြှင့်တင်ခြင်းကိုလည်း ဆောင်ရွက်ပေးသွားမည်ဟု သိရသည်။
ပါဝင်သောပစ္စည်းများ 
ပါဝင်သောပစ္စည်းများ